مندرجہ ذیل ذکر 30 جون 2022 کو جنگ میں مندرجہ ذیل لنک پر شائع ہوا۔
پاکستان میں جمہوریت اور شفافیت کے فروغ کیلئے کام کرنے والے ادارے پلڈاٹ کے سربراہ احمد بلا ل محبوب کا کہنا ہے کہ پاکستان میں پارلیمنٹ کمزور ہے ، اس کو مضبوط ہونا چاہیے، پارلیمنٹ مکالمے اور احتساب کا نام ہے اور ہمارے ہاں دونوں امور پارلیمنٹ کے دائر ہ اختیار سے باہر نظر آتے ہیں ،عالمی یوم پارلیمان پر خاموشی افسوسناک ہے ، ناتواں پارلیمنٹ نے کمزور بجٹ پاس کیا ،جس ملک میں سارا سال ہی بجٹ بنتے اور ٹوٹتے رہیں وہاں بجٹ یا پارلیمان کی کیا توقیر ہو گی ؟نمائندہ جنگ سے بات چیت کرتے ہوئے احمد بلال محبوب نے کہا کہ آئین کے آرٹیکل 84 میں وفاقی حکومت اور آرٹیکل 124 کے ذریعے صوبائی حکومتوں کو سپلیمنٹری بجٹ کا اختیار دیا گیا ہے ، دنیا کی کس جمہوریہ میں یہ اختیار حاصل نہیں کہ آپ بجٹ کی منظوری کے بعد سال بھر جتنا جی چاہے خرچ کر دیں اور اخراجات اسمبلی میں پیش کر کے بری الزمہ ہو جائیں ، پاکستان میں پارلیمنٹ کمزور ہے ،پنجاب میں حکومت اپوزیشن نے الگ الگ پارلیمنٹس بنا رکھی ہیں ،دونوں کے الگ الگ اجلاس ہو رہے ہیں، کوئی پوچھنے والا نہیں، پارلیمنٹ کو مضبوط ہونا چاہیے، پارلیمنٹ مکالمے اور احتساب کا نام ہے اور ہمارے ہاں دونوں امور پارلیمنٹ کے دائر ہ اختیار سے باہر نظر آتے ہیں ۔
